Cəbrayıllıların doğma yurdlarına qayıdışı davam edir

Azərbaycan Respublikasının Prezidenti cənab İlham Əliyevin tapşırığına uyğun olaraq, işğaldan azad edilmiş ərazilərə Böyük Qayıdışa dair I Dövlət Proqramına əsasən, yenidən qurulan Cəbrayıl şəhərinə sakinlərinin qayıdışı davam edir. 26 sentyabr 2024-cü il tarixdə Bakının Qaradağ rayonundan yola salınan   ilk köç karvanında   respublikamızın  müxtəlif ərazilərində - yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış 36  ailə 117 məcburi köçkün  doğma yurduna qovuşub.  28 sentyabr 2024-cü il tarixdə  isə Bakı şəhərindən 18 ailə 56 sakin, Sumqayıt şəhərindən 2ailə 8 sakin,Abşeron rayonundan 2 ailə 6 sakin, Saatlı rayonundan 3 ailə 6 sakin,  Biləsuvar rayonunda salınmış Cəbrayıl qəsəbələrindən 16 ailə 48 sakin olmaqla 41 ailə 124  sakin növbəti köç karvanında  yola salınıb.

Beləliklə  bu günədək Cəbrayıl şəhərinə 77 ailə 241  rayon sakini   köçürülərək,  daimi məskunlaşmaları  təmin edilib. 30 il yurd həsrətində olan Cəbrayıllıların sevincinin həddi-hüdudu yoxdur. Doğma yurdlarına qayıdan şəhər sakinləri  Cənab Prezident, Müzəffər Ali Baş Komandan İlham Əliyevin rəhbərliyi altında  Vətən torpağını öz canları, qanları bahasına bütövləşdirən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirib, ölümləri ilə xalqa yeni nəfəs verən   şəhidlərimizə rəhmət, sağlamlığını itirmiş qazilərimizə can sağlığı   diləyiblər.  

Məcburi köçkünlük illərində olduğu kimi bu gün də cəbrayıllılar dövlətimizin hərtərəfli qayğısını öz üzərlərində hiss edirlər.