Cəbrayıl rayonunda “Bəşəriyyətin bəlası ağ ölümə yox deyək!” adlı tədbir keçirilib

    05 noyabr 2024-cü il tarixdə rayonun V.İsmayılov adına Çərəkən kənd tam orta məktəbində 20 oktyabr – 20 noyabr “Uşaq Hüquqları aylığı” çərçivəsində “Bəşəriyyətin bəlası ağ ölümə yox deyək!” mövzusunda tədbir keçirilib. Tədbirdə Cəbrayıl rayon İcra Hakimiyyətinin, rayon Polis Şöbəsinin məsul əməkdaşları, məktəbin müəllim və şagird kollektivi iştirak ediblər.
    Çıxış edənlər narkomaniyanın sağlamlıq üçün ciddi təhlükə yaratmağından, narkotik vasitələrin cəmiyyət üçün yaratdığı problemlərdən geniş söhbət açıblar. Ölkəmizdə narkomanlığa qarşı ciddi mübarizənin aparıldığını, narkotik vasitələrin qanunsuz dövriyyəsi ilə məşğul olan şəxslərin müəyyən edilərək məsuliyyətə cəlb olunması istiqamətində uğurlu tədbirlərin həyata keçirildiyini nəzərə çatdıran natiqlər gənclərə bu bəladan uzaq olmalarını, təhsilə, idmana daha çox maraq göstərmələrini tövsiyə ediblər.
    Çıxışlar zamanı həmçinin cəmiyyətin inkişafını ləngidən, insanların sağlamlığına və mənəviyyatına sarsıdıcı zərbə vuran narkomaniyaya qarşı mübarizənin gücləndirilməsi məqsədilə ölkəmizdə, rayonda kompleks tədbirlərin mütəmadi olaraq həyata keçirildiyi və təbliğat işlərinin genişləndirildiyi qeyd olunub.
    Sonda narkomaniyanın təhlükəli fəasadlarından bəhs edən videoçarx nümayiş olunub.