Cəbrayıl rayonunda 5 dekabr-Beynəlxalq Könüllülər günü münasibətilə "Sən də könüllülər sırasına qoşul" adlı tədbir keçirilib

    05 dekabr 2024-cü il tarixdə Cəbrayıl rayonunda “5 dekabr-Beynəlxalq Könüllülər günü “münasibətilə tədbir keçirilib. Tədbirdə rayon İcra Hakimiyyəti başçısının müavini Fəridə İbayeva, Qızıl Aypara Cəmiyyətinin rayon bölməsinin sədri Bəhruz Məmmədov, Beynəlxalq Qızıl Xaç Komitəsinin əməkdaşı Elnarə Ağayeva, Azərbaycan Qızıl Aypara Cəmiyyətinin fövqəladə Mobil Könüllü Dəstəsinin koordinatoru Nigar Rüstəmzadə və Azərbaycan Qızıl Aypara Cəmiyyətinin Rayon bölməsinin könüllüləri iştirak ediblər.
    Çıxış edənlər könüllülük fəaliyyətinin əhəmiyyətindən, ölkəmizdə keçirilən beynəlxalq tədbirlərin təşkilində könüllülərin xüsusi rolundan, könüllülük fəaliyyətinin onlara gələcəkdə qazandıracağı uğurlardan geniş söhbət açıblar. Bildirilib ki, gənclərimizin potensialının, fəallığının, məsələlərə yeni baxışlarının cəmiyyət üçün çox lazımlı olduğunu diqqətə alan Azərbaycan Respublikasının Prezidenti cənab İlham Əliyevin tövsiyəsinə əsasən dövlət qurumlarına könüllülərin cəlb olunması uğurla davam etdirilir. Sevindirici haldır ki, bu gün könüllülərimiz ölkə həyatının bütün sahələrində fəal iştirak edirlər. Azad edilən torpaqlarımızda həyata keçirilən quruculuq-abadlıq işlərində, doğma diyarımızın yenidən çiçəklənməsində də könüllülərin iştirakı mühüm əhəmiyyət kəsb edir. Bu gün Azərbaycan könüllülərinin yüksək fəallığı, vətənpərvərliyi, dövlətə və Vətənə bağlılığı könüllü gənclərimizin Qarabağa qayıdış prosesinə də öz töhfələrini verdiklərindən xəbər verir.
    Sonda Azərbaycan Qızıl Aypara Cəmiyyətinin Cəbrayıl Rayon bölməsinin könüllülərinə rayon İcra hakimiyyəti başçısının təşəkkürnaməsi təqdim olunub və xatirə şəkli çəkilib.