Cəbrayıl Rayon İcra Hakimiyyətinin başçısı Kamal Həsənov Bakı şəhəri, Binəqədi rayonunda səyyar görüş-qəbul keçirib

Mart ayının 13-də rayon İcra Hakimiyyətinin başçısı Kamal Həsənov Bakı şəhəri, Binəqədi rayonunda fəaliyyət göstərən rayonun Qovşudlu kənd tam orta məktəbində rayon sakinlərini qəbul edib. Qəbul zamanı vətəndaşların müraciətləri dinlənilib, onları narahat edən məsələlər diqqətlə araşdırılıb. Vətəndaş qəbulunda rayon İcra Hakimiyyətinin başçısı Kamal Həsənovla birgə, aparatın məsul əməkdaşları və rayon sakinləri iştirak ediblər.

 İcra başçısı sakinləri salamlayıb, müqəddəs Ramazan ayı və qarşıdan gələn Novruz bayramı münasibətilə təbrik edib, ürək sözlərini çatdırıb. Rayon rəhbəri hər zaman olduğu kimi, bugünkü səyyar görüşün əsas məqsədinin vətəndaşları narahat edən qayğıları, qaldırılan məsələləri, səslənən fikirləri dinləmək, həlli istiqamətində əməli işlər görmək, ehtiyac yarandığı halda aidiyyəti təşkilatlar, mərkəzi icra hakimiyyəti orqanları qarşısında məsələ qaldırmaq olduğunu bildirib. Daha sonra İcra başçısı "Şəhərsalma və Memarlıq İli" çərçivəsində cənab Prezident İlham Əliyevin birbaşa nəzarəti altında "Böyük qayıdış" proqramına əsasən işğaldan azad olunmuş ərazilərdə aparılan quruculuq işlərindən və əhalinin öz doğma torpaqlarına qayıdışından geniş söhbət açıb.

Görüşdə iştirak edən sakinlər onların müraciətlərinin dinlənilməsinə və həlli istiqamətində göstərilən diqqətə görə ölkə başçısı İlham Əliyevə və Birinci vitse-prezident Mehriban Əliyevaya minnətdarlıqlarını ifadə ediblər.