Azərbaycanın Milli Qəhrəmanı Mətləb Quliyev - 66

    Bu il Azərbaycanın Milli Qəhrəmanı, Birinci Qarabağ müharibəsi şəhidi, həmyerlimiz Mətləb Quliyevin anadan olmasının 66 ili tamam olur. Əslən Cəbrayıl rayonundan olan Mətləb Kamran oğlu Quliyev 1959-cu il yanvarın 9-da Beyləqan şəhərində anadan olub, uşaqlıq illərindən ailəsi ilə birlikdə Sumqayıt şəhərinə köçərək orada yaşayıb. Ukrayna Respublikasında hərbi xidməti başa vuran qəhrəmanımız Azərbaycan Dövlət Pedaqoji institutunda təhsilini davam etdirib. İnstitutda oxudğu illərdə “Təhsil əlaçısı” döş nişanı ilə təltif edilib. 1985-ci ildə leytenant rütbəsi ilə ali məktəbi bitirərək, Sumqayıt şəhər 3 saylı orta məktəbdə hərbi hazırlıq müəllimi kimi fəaliyyətə başlayıb. 1992-ci ildən Daxili Qoşunlarda xidmətini davam etdirərək, cəbhənin müxtəlif istiqamətlərində cəsarətlə vuruşub. Elə həmin il avqustun 31-də Ağdam bölgəsində düşmənə qarşı döyüşdə şəxsi şücaət göstərərək, pulemyotla təkbaşına düşmənin üzərinə yeriyib, onlarla erməni yaraqlısını məhv edib, özü də qəhrəmanlıqla həlak olub.
    Azərbaycan Respublikası Prezidentinin 6 noyabr 1992-ci il tarixli 290 saylı fərmanı ilə baş leytenant Quliyev Mətləb Kamran oğlu ölümündən sonra "Azərbaycanın Milli Qəhrəmanı" adına layiq görülüb. Bakı şəhərində Şəhidlər Xiyabanında dəfn edilib. Sumqayıt şəhər 3 saylı məktəb igid eloğlumuzun adını daşıyır, məktəbin önündə büstü qoyulub, yaşadığı binanın önünə xatirə lövhəsi vurulub, adına bulaq var.
    Ailəli idi, iki övladı yadigar qalıb.