Şəhid Böyükağa Şahvediyevin xatirəsi yad edilib

    15 iyun 2021-ci il tarixdə Vətən müharibəsində qəhrəmancasına şəhid olmuş əslən Cəbrayıl rayonunun Çaxırlı kəndindən olan Şahvediyev Böyükağa Savalan oğlunun doğum günü münasibətilə Biləsuvar rayonu ərazisində salınmış 3 saylı qəsəbə qəbiristanlığının Şəhidlər məzarlığında anım tədbiri keçirilmişdir. Tədbirdə Cəbrayıl rayon İcra  Hakimiyyətinin məsul əməkdaşları, müharibə əlilləri, veteranlar, şəhid ailələri və ictimaiyyət nümayəndələri, şəhidin ailə üzvləri, döyüş yoldaşları, məzunu olduğu 10 saylı tam orta məktəbinin müəllim və şagirdləri iştirak etmişlər. Tədbir iştirakçıları öncə şəhidin məzarı önünə gül dəstələri düzmüş, onun əziz xatirəsinə ehtiramlarını bildirmişlər. Daha sonra canlarını Azərbaycanın ərazi bütövlüyü uğrunda qurban vermiş Vətən müharibəsi şəhidlərinin əziz xatirəsinə dualar oxunaraq  xatirələri bir  dəqiqəlik sükutla yad edilmişdir.
    Tədbirdə rayon İcra  Hakimiyyəti  başçısının müavini Fəridə İbayeva şəhidin keçdiyi döyüş yolundan söhbət açaraq bildirmişdir ki, ölkəmizin ərazi bütövlüyü uğrunda gedən döyüşlərdə qəhrəmancasına şəhid olmuş oğullarımızın xatirəsi daima yaddaşlarda qalacaq. Məhz onların göstərdiyi şücaət nəticəsində 30 ilə yaxın işğal altında olan torpaqlarımız, işğaldan azad olundu. Ali Baş Komandan İlham Əliyevin rəhbərliyi ilə gedən döyüşlərdə ordumuz bir daha dünyaya qüdrətini sübut etdi.    Ölkəmizdə şəhid ailələrinin, müharibə əlillərinin problemləri daim diqqət mərkəzindədir və son illər ərzində bu istiqamətdə çox böyük işlər görülür. Ölkə başçısı cənab İlham Əliyevin   imzaladığı fərman və sərəncamlar bunu bir daha sübut edir. Şəhid ailələrinin, müharibə əlillərinin, veteranlarının sosial ehtiyaclarının ödənilməsi həmçinin bu insanların mənzil və avtomobillərlə təmin olunması, övladlarının təhsil haqqından azad edilməsi ölkə ictimaiyyəti tərəfindən yüksək minnətdarlıqla qarşılanır.      Ümumiyyətlə şəhid ailələrinə dövlət qayğısının göstərilməsi  Azərbaycanın daxili siyasətində prioritetdir. F.İbayeva Şəhidin anasına və ailə üzvlərinə başsağlığı verərək, belə qəhrəman övlad böyütdükləri üçün minnətdarlığını bildirmişdir.
    Daha sonra tədbirdə çıxış edənlər qəhrəman övladların igidliyi, qəhrəmanlığı, şücaəti  nəticəsində 30 illik vətən həsrətinə son qoyulduğunu bir daha tədbir iştirakçılarının diqqətinə çatdırmışlar. Şəhidin anası övladının qəhrəmanlığı ilə fəxr etdiyini,      Şəhid  ailələrinə  göstərilən diqqət və qayğıya görə Azərbaycan Respublikasının Prezidenti Ali Baş Komandan cənab İlham Əliyevə öz dərin minnətdarlıqlarını bildirmişdir.
    Sonda 10 saylı tam orta məktəbinin şagirdləri Vətənə, torpağa və şəhidlərimizə həsr olunmuş şerlər səsləndirmişlər.