Vətən sevgisi, şəhidlik zirvəsi...
Vətənpərvərliyin ən ali məqamı - şəhidlikdir. Bu ucalığa yüksələnlərin ömür yolu nə qədər qısa olsa da, şərəfli və örnək sayılır.
Azərbaycanın müstəqilliyi və ərazi bütövlüyü uğrunda qəhrəmanlıqla mübarizə aparan, xalqımızın azadlığını hər şeydən uca tutan, bu yolda həyatlarını qurban verərək şəhidlik zirvəsinə ucalan igid oğullarımız çoxdur. 2016-cı il aprel ayının 2-də Lələtəpə yüksəkliyinin düşmən işğalından azad edilməsi uğrunda gedən döyüşlərdə qəhrəmancasına şəhid olmuş rayonun Xudaverdili kənd sakini 22 yaşlı Ruhin Əşrəf oğlu Qəhəmanov və Tərtər rayonu ərazisində erməni təxribatının qarşısının alınması zamanı şəhid olmuş Sarıcallı kənd sakini 19 yaşlı Mahmud Azər oğlu İbahimov belə oğullarımızdadır.
Torpaqlarımızın qorunması yolunda canlarından keçmiş bu cür şəhidlərimizin hünəri gənclərimizə örnəkdir. Hər bir Azərbaycan vətəndaşı öz qəhrəmanlarını tanımalı, onların keçdiyi həyat yolundan çox şeyləri öyrənməlidir. Şəhidlik zirvəsinə ucalanların xatirəsini yaşatmaq, onları gəncliyə nümunə göstərmək isə hər kəsin vətəndaşlıq borcudur.
Ruhin Əşrəf oğlu Qəhəmanov
Azərbaycan Silahlı Qüvvələrinin kiçik çavuşu, kəşfiyyatçı Ruhin Əşrəf oğlu Qəhəmanov 10 oktyabr 1994-cü ildə Biləsuvar rayonunun ərazisində yerləşən 2 saylı çadır şəhərciyində dünyaya gəlib. Əslən Cəbrayıl rayonun Xudaverdili kəndindəndir. 2012-ci ildə Cəbrayıl rayon Ramiz Xudiyev adına Minbaşılı kənd tam orta məktəbinin 11-ci sinfini bitirib, həqiqi hərbi xidmətə yollanıb. Xidmətini başa vurduqdan sonra könüllü olaraq müddətdən artıq həqiqi hərbi xidmət hərbi qulluqçusu kimi ordu sıralarında qulluq edib.
Ruhin Qəhrəmanov 2016-cı ilin aprel ayının 2-də Lələtəpə yüksəkliyinin düşmən işğalından azad edilməsi uğrunda gedən döyüşlərdə qəhrəmancasına şəhid olub və ölümündən sonra "İgidliyə görə" medalı ilə təltif edilib.
Mahmud Azər oğlu İbrahimov
Şəhid İbrahimov Mahmud Azər oğlu 03 sentyabr 1997-ci ildə Cəbrayıl rayonunun Sarıcallı kənd sakini Azər İbrahimovun ailəsində dünyaya göz açıb.
2005-ci ildə Bakı şəhəri, Səbail rayonu, Bayıl qəsəbəsində fəaliyyət göstərən Laçın rayonu 40 saylı tam orta məktəbini bitirmiş, 2015-ci ildən Tərtər rayonunun Qapanlı kəndində hərbi xidmətdə olmuşdur.
02 aprel 2016-cı il tarixdə Tərtər rayonunun Talış yüksəkliyi istiqamətində döyüşlərdə qəhrəmancasına həlak olmuş, 09 aprel 2016-cı il tarixdə Bakı şəhəri, Zabrat qəsəbəsində dəfn olunmuşdur.
Allah bütün şəhidlərimizə rəhmət eləsin.
