Təhsil naziri Cocuq Mərcanlı kənd tam orta məktəbində olub
Oktyabrın 16-da Azərbaycan Respublikasının Təhsil naziri cənab Mikayıl Cabbarov Cəbrayıl rayonunun işğaldan azad edilmiş Cocuq Mərcanlı kəndində olub.
Təhsil naziri Mİkayıl Cabbarov və Cəbrayıl Rayon İcra Hakimiyyətinin başçısı Kamal Həsənov “Aprel şəhidlərinə xatirə” abidəsini ziyarət edib, Vətən uğrunda şəhid olanların xatirəsini ehtiramla anıblar.
Daha sonra nazir şəhid Novruz Aslanov adına Cocuq Mərcanlı kənd tam orta məktəbində müəllim və şagird kollektivi ilə görüşüb. M.Cabbarov məktəbdə yaradılan şəraitlə tanış olub.
Ümumi təhsil müəssisələrində 2017-2018-ci tədris ilinin ilk dərslərinin “Cocuq Mərcanlı - tarixi qayıdışın başlanğıcı” mövzusuna həsr olunduğunu xatırladan nazir bu tarixin uşaq və gənclərin vətənpərvərlik tərbiyəsinin möhkəmləndirilməsində böyük əhəmiyyət daşıdığını diqqətə çatdırıb. M.Cabbarov işğaldan azad olunmuş Cocuq Mərcanlı kəndində məktəbin fəaliyyətə başlamasının, uşaqların təlim və tədris prosesində rahat iştirakının burada dinc və firavan həyatın təmin edilməsinin bariz nümunəsi olduğunu bildirib. Təhsil Nazirliyi adından məktəbə elektron lövhə və digər hədiyyələr təqdim edilib.
